Kryeministri Edi Rama ka reaguar pas deklaratës së presidentit Meta, i cili dënoi miratimin e ndryshimeve kushtetuese.
Përmes një postimi në Twitter, Rama e cilëson Metën si shkelës të kushtetutës, duke thënë se ai nuk u shkarkua vetëm se qeveria respektoi vendimin e Komisionit të Venecias.
Më tej, kryeministri akuzon kreun e shtetit se ka tentuar të ndezë konfliktin e popullit shqiptar me shtetin.
Reagimi i plotë:
Ilir, ti je nje shkelës recidiv i Kushtetutës sipas Venecias, por po sipas Venezias e ke shkelur, po jo aq rëndë Kushtetutën sa për t’u shkarkuar! Dhe ne që shkeljet e tua i mbajtëm në kurriz,respektuam Venecian e s’të shkarkuam,sepse jemi të përgjegjshëm në përfaqësimin e vendit! Por siç nuk i ndalove dot zgjedhjet vendore dhe siç nuk e fute dot në zjarr Shqipërinë dje, nuk ke asnjë shans ta ndalosh Kushtetutën e Shqipërisë të jetë detyruese edhe për ty, ashtu sikundër s’ke asnjë shans të ndezësh zjarrin e ëndërruar të konfliktit të popullit me shtetin! Prandaj boll u bëre dhe na bëre të gjithëve qesharakë si shtet, duke e përdorur zyrën e Presidentit si llogore lufte politike, duke sharë ambasadorët siç bënte Haxhi Qamili e duke i folur vetes në vetë të tretë si Luigji XIV! Boll se s’të ka askush asnjë borxh, jo më Shqipëria!/
