Agjencia Australiane e Antarktidës (AAD), deklaron se një ajsberg në madhësinë e qytetit të Sidney është ndarë nga Antarktida Lindore.
Sipas kësaj agjencie, faktor për shkëputjen e ajsbergut nuk kanë qenë ndryshimet klimatike.
“Ajsbergu, i quajtur zyrtarisht D-28, është i ndarë nga pjesa e përparme e platformës së akullit, të cilin shkencëtarët e kanë monitoruar nga afër që nga fillimi i viteve 2000”, thotë AAD.
Mediat e huaja shkruajnë që ajsbergu prej 1 636 kilometrash katror u nis nga Amery Ice, i treti më i madh në kontinentin akullnajor, i vendosur midis stacioneve kërkimore australiane të Davis dhe Mawson, më datë 26 shtator.
“Ne nuk mendojmë se kjo ngjarje ka të bëjë me ndryshimin e klimës, por është pjesë e ciklit normal të platformës së akullit, ku ne shohim ngjarje të rëndësishme çdo 60-70 vjet”, tha Helen Amanda Fricker, profesoreshë në Institutin e Oqeanografisë me qendër në SHBA.
