Aktori i mirënjohur Ndriçim Xhepa ka rrëfyer për “News 24” takimin e fundit që pati me kolegun i cili u nda sot nga jeta, pasi humbi betejën nga një sëmundje e rëndë, Xhevdet Ferri. Ai tregon se ishte në dijeni të gjëndjes së kolegut e njëkohësisht të mikut të tij. Xhepa tregon se vizita e tij e fundit me të ka qenë mbrëmë, pasi ishte njoftuar se Xhevdeti ishte jo mirë nga ana shëndetësore. Mjeku e kishte paralajmëruar se shpresat ishin të pakta.
“I kam ditur gjërat që në pranverë, kur u operua. Vetë ai me optimizmin dhe forcën që kishte si mashkull, mendonte se do kalonte. Ndoshta mund të jem i fundit nga njerëzit e artit që e kam parë mbrëmë, përjashtuar familjarëve. Siç mora njoftimin se dje ishte jo mirë në spital, shkova e vizitova mbrëmë. Bënë një tolerancë mjekët që më dhanë një mundësi të vogël për ta parë.
Bëra mirë apo keq nuk e di, pasi e pashë në gjendje të rëndë. Mjeku më thoshte se shpresat ishin shumë të vogla. Nuk pati mundësi, forcë ta përballonte. As 24 orë nuk janë bërë. Komunikova sot me bashkëshorten, do të bëhej një përpjekje tek Sanatoriumi.
Fundi ishte shumë i shpejtë, nuk më shkoi mendja. Shumë e dhimbshme. Në këtë 2-javshin e fundit ka qenë në spital.
Në rolin e fundit të jetës së tij ishim bashkë. Ishte shumë i zgjuar, i përgatitur. Aktor me shumë shije, me finesë në lojën e ekranit, të parakamerës. Bisedohej gjatë me të miqësisht për të trajtuar gjërat”, tha ai.
Xhevdet Ferri është ndarë nga jeta para kohe në moshën 59 vjeçare. Aktori i njohur i filmave mësohet se prej kohësh vuante nga një sëmundje tumorale, dhe ditët e fundit ka qenë i shtruar në reanimacion, por pa mundur t’ja dalë.
