Kreu i Grupit Parlamentar të PS-së, Taulant Balla ka folur rreth aksionit opozitar “Ndiq paranë”, i cili sipas Bashës, është një plan që bazohet në 4 hapa për zhdukjen e ndikimit dhe pasojave të grabitjes së vendit nga mazhoranca.
I ftuar në rubrikën “Opinion” në News24, Balla ka akuzuar udhëheqësin e këtij aksioni, Lulzim Bashën se ai është objekt i një hetimi skandaloz për financim të PD-së nga ana e oligarkëve rusë.
“Në Shqipëri nuk ka krizë politike. Mirëpo ka krizë të një partie politike. Opozita nuk është monopol i askujt. Por kjo opozitë nuk flet për hallet e popullit. Dëgjova dje që Basha kishte marrë nismën “Ndiq paratë”, ndërsa Lulzim Basha është subjekt i një hetimi për FBI, për Prokurorinë shqiptare i një prej skandaleve me lobim rus kundër interesave të Shqipërisë”, tha Balla.
Më tej, Balla foli edhe për zgjedhjet e zhvilluara më datë 30 qershor duke deklaruar se pjesëmarrja ishte e shkëlqyer.
“Në ato kushte që janë bërë zgjedhjet, pjesëmarrja ka qenë e shkëlqyer. Ishim në kushte të vështira, të mos harrojmë asnjëherë. Askush nuk mund të guxoj besoj të thotë se këto zgjedhje nuk ishin të mira dhe pjesëmarrja e kënaqeshme. Prej ditës së parë, qasja jonë ka qenë ‘shtet, punë dhe mirëqenie. Të bësh shtet do të thotë të respektosh rregullat, si për njerëzi e thjeshtë ashtu edhe për politikanët. Nëse ju shkelni një kundra-vajtje ta themi në qarkullim, njësoj duhet të veprojë ndaj çdo personi”, deklaroi ai.
Taulant Balla theksoi se zhdekretimi është një tmerr i shpikur nga presidenti Meta. Ai tha se fton opozitën të heqë dorë nga kjo politikë, ndërsa tha se PD mund të shohë shembullin e mirë të disa politikanëve opozitarë si Rudina Hajdari e Myslim Murrizi.
