Duke iu përgjigjur pyetjeve të qytetarëve, kryeministri kërkoi veçse durim nga ana e tyre, pas shprehjes së ankesave se populli do të vdesë për bukë.
Teksa paralajmëroi se ashpërsimi i masave do të vazhdojë, për t’u mbrojtur nga koronavirusi vdekjeprurës, Rama tha se ndëshkimet do të bëhen shembullore për të gjithë ata që na kërcënojnë. Duke paralajmëruar se rreziku nga COVID-19 vjen vërdallë, ai iu përgjigj zërave se gjobat janë për të mbushur buxhetin.
Ai i mëshoi fort faktit se gjobat janë për të minimizuar rrezikun. “Historia jonë është bukë, kripë e zemër”, tha më tej kreu i qeverisë. Duke qëndruar në të njëjtën linjë, ai u shpreh se shqiptarët nuk kanë vdekur kurrë për bukë, dhe se në këtë vend ka solidaritet.
Kryeministri ka sqaruar se nga sot do të ketë një aplikacion të veçantë, për të gjithë ata që duan të shkojnë në punë me makinën e tyre. “Sa herë do të të njoftojmë? Fasha e orarit është zgjeruar, sepse kemi bërë një hapje me pikatore në funksion të çlirimit të gjithë asaj shtrëngese dhe kemi përparim falë jush. Edhe për të lehtësuar, po bëjmë zgjerimin e fashës orare. Fasha është 05:00 me 17:30. Sot do t’ju japim aplikim të thjeshtë për të gjithë ata që duan të shkojnë në punë me makinë. Kush ka makinë, do të shkojë me makinë në punë, jo për xhiro, siç kemi vënë re se ka ndodhur dje dhe të premten. Duke vënë re këto shenja që na vënë në rrezik, do të lejojmë lëvizjen me makinë për në punë”.
