Bledar Devolli, trajner i skuadrës së Kastriotit bën të ditur se ishin pikërisht deklaratat e presidentit Halili arsyeja e motivimit të skuadrës së tij.
Refik Halili i është drejtuar skuadrës së Kastriotit si një skuadër ‘koti’ dhe ky sipas Devollit ishte një motiv mëse i mjaftueshëm për ta mobilizuar ekipin e tij.
Kujtojmë se ndeshja Tirana – Kastrioti që u zhvillua më datë 18 Maj, në kuadër të Superligës, përfundoi në rezultatin barazim 0-0.
Deklarata e plotë e Bledar Devolli:
“Deklaratat e Halilit qenë një autogol që ka bërë presidenti i Tiranës. Ndoshta ishte pas derbit, ashtu siç kam bërë unë një apo dy herë. Kemi shumë presion, por deklarata ishte 50 për qind e motivimit. Të dielën më shumë u kënaqëm, pasi luajtëm ndaj një ekipi të madh siç është Tirana, paçka pozicionit që ka. E kemi edhe rival direkt dhe donim që t’ua tregonim të gjithëve: Ja ku na ka. Nuk donim ta humbitnim ndeshjen direkte me çdo lloj çmimi. E kishim përgatitur takimin mirë gjatë javës dhe ashtu na doli. E presuam lart dhe rastet që pati Ngoja ishin gabimet tona. Na shpëtoi Zoti. Ne rastet i bëmë me aksione të rrjedhshme, ndërsa ata dy herë rrezikuan me kundërsulmin. Djemtë ishin të kënaqur në fund të takimit. Laçi nuk luan për Kastriotin, por për veten e tij. Shpresoj edhe një dorë nga Zoti. Na solli deri këtu e le të na çojë deri në fund”, mbylli Devolli për “RTSH Sport”.
