Luhet ditën e sotme ndeshja mes Shqipërisë dhe Islandës, sfidë e cila do të ekzekutohet në “Elbasan Arena”.
Ndërkohë pak orë para fillimit të ndeshjes, presidenti Meta, ka bërë të ditur se edhe pse ka shumë angazhime të tjera të rëndësishme, ai do jetë i pranishëm në stadium.
Përmes një statusi në Facebook, Meta iu bën thirrje tifozëve shqiptarë për mbështetje, teksa thotë se “le të mësojmë dhe nga tifozët e Kosovës, që pikërisht kur ekipi është në disavantazh, ndizen më shumë në përkrahjen e ekipit”.
Postimi i plotë:
Nuk kisha në plan të shkoja sot në “Elbasan Arena” për shkak të shumë detyrimeve të tjera, por besoj se të gjithë duhet të jemi më pranë
se asnjëherë Kombëtares sonë që pas shkëlqimit të jashtëzakonshëm në Europianin e Francës është në tranzicion drejt rigjetjes së vetvetes. Shpesh tifozët kërkojnë vetëm fitore, por topi është i rrumbullakët. E di që shumë tifozë janë mërzitur nga humbja me Francën, kampionen e botës, por mos harroni si humbi Brazili me Gjermaninë 1-7.
Le të mësojmë dhe nga tifozët e Kosovës, që pikërisht kur ekipi është në disavantazh, ndizen më shumë në përkrahjen e ekipit.
Sot në “Elbasan Arena” me Kuqezinjtë!
