Lionel Messi do të zhvillojë ndeshjen e 600 me fanellën e Barcelonës sonte përballë sevillias, që nga koha e debutimit në 2004-ën e largët. Argjentinasi në 14 sezone rresht ka qenë në qendër të projekteve të secilit trajnerë që e ka shoqëruar në këto vite atë. Padyshim meritë të madhe në fitimin e kaq shumë trofeve në këto vite e ka pasur ai, pasi statistikat që ka në kaq ndeshje të luajtura janë të mrekullueshme.
Në 599 ndeshje të luajtura, katalanasit me mesin në fushë kanë arritur të fitojnë 425, të barazojnë 105 dhe të humbin vetëm në 69 raste. Gjatë kësaj kohe ai ka arritur të fitojë katër herë titullin më të lakmuar në Europë, Champions League, ndërsa në trofetë individualë veçohen pesë “Topat e Artë”, që mban në sirtarin e tij.
Ndërkohë sa u përket golave të shënuar statistikat janë perfekte, ai ka arritur të shënojë 522 gola, nga të cilët 33 janë tregolësha dhe mbi 100 raste janë dopieta. Sa i përket sfidës që do të luajë sonte, ai Sevillian e ka një ndër viktimat e preferuara për ti shënuar, pasi deri më sot u ka shënuar plot 29 herë. Kjo të bën të besosh se ndeshja e 600 për Lionel Messin do të jetë një ndeshje e madhe.
