Gazetari i njohur nga Kosova, Sulejman Gashi, ka ndërruar jetë ditën e sotme në Shtetet e Bashkuara të Amerikës.
Lajmi bëhet i ditur nga i biri i tij, Drilon Gashi, me anë të një postimi në Facebook.
“Ai po luftonte shumë që të rikthehej nga gjendja e rëndë që kishte pësuar katër vite më parë. Varrimi i të ndjerit do të bëhet në vendlindjen e tij në Kosovë, vendin të cilin ai e deshi aq shumë. Sulejman Gashi bëri një jetë, dhe la një vepër, me domethënie të jashtëzakonshme për familjen, profesionin, vendin dhe kombin e tij”, thuhet në njoftimin e familjes Gashi.
Lidhur me vdekjen e tij ka reaguar edhe presidenti i Kosovës, Hashim Thaçi, i cili shkruan:
“Më pikëlloi shumë vdekja e hershme e gazetarit të njohur të RTK-së, Sulejman Gashi. Ai tërë jetën iu përkushtua gazetarisë dhe përfaqësimit të Kosovës në Shtetet e Bashkuara të Amerikës, duke u bërë zë i shqiptarëve. Ngushëllime familjes Gashi, kolegëve të tij gazetarë dhe gjithë të afërmve të tij”.
