Mijëra njerëz po shënojnë sot në qytetin e Nju Jorkut, në kryeqytetin e vendit Uashington dhe në Shanksville të Pensilvanisë 19 vjetorin e sulmeve terroriste të vititi 2001 që lanë 3 mijë personat e vrarë pas rrëmbimit të 4 avionëve, dy prej të cilëve goditën kullat e Qendrës Botërore të Tregtisë, njeri Pentagonin dhe tjetri u rrëzua në një fushë në Pensilvani.
Në qytetin e Nju Jorkut ceremonitë po zhvillohen në memorialin e 11 shtatorit, aty ku si çdo vit që nga sulmi, po lexohen emrat e viktimave përfshirë dhe ata të një sulmi në vitin 1993 ndaj Qendrës Botërore të Tregtisë. Në të gjithë qytetin e Nju Jorkut u mbajt një moment heshtjeje në orën 8:46 të mëngjesit me orën lokale pikërisht koha kur një nga avionët u përplas me Kullën Veriore.
Presidenti Donald Trump shoqëruar nga Zonja e Parë Melania Trump po marrin pjesë në ceremoninë e zhvilluar në Shanksville të Pensilvanisë atje ku u rrëzua një prej avionëve të rrëmbyer. Presidenti mbajti dhe një fjalim gjatë ceremonisë.
Në Shanksville të Pensilvanisë pritet të shkojë më pas edhe rivali i tij demokrat Joe Biden. Fillimish zoti Biden po merr pjesë në ceremoninë që po zhvillohet në Manhatanin e poshtëm në Nju Jork. Kandidati demokrat presidencial Joe Biden, Nënpresidenti Mike Pence dhe Guvernatori i Nju Jorkut Andrew Cuomo, të gjithë me maska në fytyrë, iu bashkuan ceremonisë që shënoi përvjetorin e 19-të të zymtë të këtij qyteti pas sulmeve të 11 shtatorit në vendin ku dikur ngrihej Qendra Botërore të Tregtisë.
Çfarë ndodhi atë ditë?
Nëntëmbëdhjetë persona të lidhur me grupin terrorist al-Kaeda kryen rrëmbimin e katër avionëve. Osama bin Laden dhe al Kaeda morën përgjegjësinë për sulmet vetëvrasëse. 11 shtatori, sulmi më vdekjeprurës në tokën amerikane që nga Pearl Harbori në 1941, ndryshoi përgjithmonë perceptimin e Amerikës mbi sigurinë dhe nxiti Presidentin e atëhershëm George W. Bush të shpallte luftë kundër terrorizmit, çka pasoi me një luftë në Afganistan.
Lufta e SHBA-së kundër terrorizmit
Forcat e koalicionit të udhëhequra nga SHBA-ja rrëzuan grupin Taleban nga pushteti në Afganistan. Lufta atje vazhdon edhe pse në fillim të këtij viti SHBA dhe Talebanët nënshkruan një marrëveshje që synon t’i japë fund konfliktit. Pas sulmeve terroriste Shtetet e Bashkuara u vunë në kërkim prej vitesh për udhëheqësin e al-Kaedës Osama bin Laden dhe në maj 2011 një ekip i forcave speciale të Marinës amerikane bastisi një vendstrehim në Abotabod të Pakistanit ku ai u qëllua për vdekje.
Memorialet që nderojnë viktimat
Përkujtimore për nder të atyre që u vranë gjatë sulmeve terroriste janë ngritur në Nju Jork, Virxhinia e Pensilvani. Pjesa e dëmtuar e Pentagonit, pas rrëzimit të avionit, u rindërtua menjëherë. Ndërtimi i një kulle të re në Qendrën Botërore të Tregtisë mori kohë të gjatë, por tashmë ajo ngrihet mbi horizontin e Manhatanit në Nju Jork, si ndërtesa më e lartë në Shtetet e Bashkuara./VOA