Është përcjellë sot për në banesën e fundit 71-vjeçari, i cili ndërroi jetë mbrëmjen e djeshme nga koronavirusi.
Ceremonia mortore është zhvilluar nën masa të rrepta, pa praninë e asnjë familjari, përveç bashkëshortes. Kjo e fundit ndodhet prej 10 ditësh e karantinuar në shtëpinë e saj, në lagjen “1 Maji” në Kuçovë.
Sipas BalkanWeb, në funeral ishin stacionuar edhe forca të shumta policore, për të verifikuar respektimin e masave të sigurisë.
Viktima u transportua nga spitali i Tiranës, direkt në varrezat e qytetit.
71-vjeçari me origjinë nga Kuçova ishte transportuar nga spitali “Shefqet Ndroqi” në spitalin Infektiv në Tiranë, përpara 7 ditëve.
Ministria e Shëndetësisë bëri me dije se ai vuante nga kanceri në mushkëri, diabeti mellitus, fibrilacion arterial dhe hipertension.
Ndërkohë pas këtij rasti, pati raportime edhe për 2 viktima të tjera të shënuara nga koronavirusi. Por Ministria e Shëndetësisë e mohoi të ketë pasur një viktimë të pestë, teksa sqaroi se pacienti ndodhet në gjendje të rëndë në vdekje klinike.
