Ndërkombëtarët kanë dënuar në mënyrë të ashpër sulmin e të enjtes, të cilin e cilësuan sulm të organizuar.
Zyrat e BE-së, NATO-s, Ambasada e SHBA-së dhe OSBE-ja, gjatë një komunikate të përbashkët theksojnë se sulmi në Kuvend është sulm kundër demokracisë. Në komunikatë theksohet shqetësimi se si autoritetet shtetërore nuk arritën ta ndalojnë sulmin dhe nuk garantuan sigurinë e domosdoshme të deputetëve dhe gazetarëve të pranishëm.
BE, NATO, SHBA dhe OSBE presin një hetim sa më të shpejtë për këto vepra kriminale dhe që autorët dhe organizatorët e sulmeve të vihen para drejtësisë, Ndërsa gjykatat të veprojnë në mënyrë të pavarur. Ndërkohë, në komunikatë u bëhet thirrje të gjitha palëve që të sillen me përgjegjësi dhe t’i kontribuojnë procesit të qetë dhe demokratik. Dhuna, thuhet në komunikatë, nuk është rruga e drejtë për vendin dhe shoqërinë e tij.
Ndihmës Sekretari i Shtetit në detyrë për çështjet e Evropës dhe Euroazisë, John Heffern, ditën e djeshme, i telefonoi presidentit të Maqedonisë, Gjorgje Ivanov. Qëllimi i telefonatës ishte për t’i shprehur shqetësimin e thellë të SHBA-së, lidhur me dhunën në Parlamentin e Maqedonisë. Sipas një zëdhënësi të Departamentit amerikan të Shtetit, z. Heffern bëri gjithashtu thirrje për zgjidhjen e krizës përmes institucioneve demokratike.
“Dhuna nuk ka vend në procesin demokratik”, është shprehur zyrtari i lartë amerikan.
Ish-kryeministri, Nikolla Gruevski, i cili është kryetar i partisë VMRO-DPMNE është shprehur se kundërshtarët politikë e kanë provokuar dhe nxitur dhunën. Një pjesë e analistëve theksojnë se Gruevski nuk do të largohet qetësisht nga pushteti. Ai do të vazhdojë të përdorë grupet e dhunshme për të krijuar frikë nga përshkallëzimi i krizës në vend.
