Merren në mbrojtje dy prokurorët e Elbasanit, Kreshnik Ajazi dhe Ridvan Sukaj.
Kreshnik Ajazi drejtuesi i kësaj prokurorie është marrë në mbrojtje që prej muajit nëntor të vitit 2020, pas ngjarjeve të verës se shkuar ku u pasuan me arrestimin e Erion Alibej. Ndërkohë Ridvan Sukaj është marrë në mbrojtje mëngjesin e kësaj të mërkure, pas arrestimit të Ardian Çapjas.
Kërkesa për marrjen në mbrojtje është bërë nga vetë prokurorët, ndonëse një fakt të tillë ata e kanë mohuar për median.
Kërkesa për mbrojtje është bërë me argumentin se u rrezikohet jeta dhe familja. Vendimi për mbrojtjen e tyre është marrë nga Komisioni për Mbrojtjen e Prokurorëve.
Kujtojmë se Ardian Çapja u arrestua dy ditë më parë në një operacion të organizuar nga Drejtoria Vendore e Policisë Elbasan dhe Drejtoria e Përgjithshme e Policisë së Shteit, me ndihmën e RENEA-s. Ndërkohë u shpall në kërkim dhe vëllai i tij Florenc Çapja.
Vëllezërit Çapja akuzohen si të dyshuar për vrasjen e ndodhur në 2012-tën, ku së bashku me shtetas të tjerë, kanë vrarë me armë zjarri shtetasit Gentian Beqiri dhe Nezir Beqiri (babë e bir).
Gjatë operacionit, në banesën e shtetasit Ardian Çapja alias Çopja, Policia gjeti dhe sekuestroi në cilësinë e provës materiale një armë zjarri kallashnikov.
Dyshohet se vrasja e bab e bir, është kryer për shkak të hasmërisë mes dy fiseve, që kanë dominuar prej vitesh qytetin e Elbasanit.
(R.G/Faxweb/al)
