Mbi 1000 mjekë dhe infermierë i janë përgjigjur apelit të Ministrisë së Shëndetësisë, për t’iu bashkuar stafit mjekësor, kundër koronavirusit. Këtë lajm e ka përcjellë kryeministri Rama. Duke folur me shifra, ai tha se vullnetarë kanë dalë 497 mjekë dhe 617 infermierë.
“Lajmi i bukur sot është se thirrjes sonë për të shërbyer vullneratisht në vijën e parë të luftës me armikun, i janë përgjigjur deri tani 497 mjekë dhe 617 infermierë.
Gatishmëri njerëzore dhe profesionale që në këtë kohë të errët për vendin të rrënqeth mishin për humanizmin dhe patriotizmin e mbi 1000 bluzave të bardha, gra dhe burra që pa asnjë detyrim janë gati të sakrifikojnë për të kuruar plagë dhe shpëtuar jetë.
Mirënjohje të gjithëve. Për gjithë mjekët dhe infermierët që janë aktualisht në atë vijë zjarri. Paga e marsit do të ketë me një bonus prej 1000 euro, që do të vazhdojë mbi rrogën dhe në muajt në vijim deri në përfundim të kësaj lufte. Bonusi do tu jepet dhe gjithë vullnetarëve që thirren në front”, tha Rama.
Në të gjithë vendin vijojnë të zbatohen masat shtrënguese të ndërmarra nga qeveria, për të frenuar përhapjen e koronavirusit. Brenda 24-orëve të fundit janë shënuar 4 raste të reja.
Disa ditë më parë, një prej të prekurve, ndërroi jetë në Spitalin e Durrësit, ndërsa deri më tani vatra e të infektuarve është zgjeruar në Tiranë, Rrogozhinë, Elbasan, Durrës, Lushnje dhe Fier. Ndërkohë jeta në vend është paralizuar thuajse totalisht, nuk ka transport publik, po ashtu dhe shumë vende pune janë mbyllur.
