Kryeministri Edi Rama paralajmëroi sërish zyrtarët e korruptuar, se nuk do t’i gëzojnë paratë që i kanë vjedhur popullit shqiptar.
Nga takimi i përjavshëm me qytetarët, Rama komentoi edhe një rast korrupsioni në Kadastrën e Durrësit. Sipas tij, kjo vijon të mbetet një plagë e hapur, por shton se do të merren masa speciale në lidhje me këtë.
“Do të jetë fundi i sigurt i gjithë merimangave dhe i rrjetit të vjetër të merimangave, që kërkojnë ushqim për të dhënë atë që në fakt është e drejta e gjithsecilit, duke futur duart në xhepa.
Na preke në plagë të hapura, që është Kadastra e Durrësit, por jam i bindur që ligji special kundër krimit të organizuar dhe asat speciale kundër KÇK do ta çlirojnë përfundimisht Kadastrën e Durrësit dhe gjithë kadastrat në Shqipëri, nga rrethimi kriminal, që ka nisur prej shumë vitesh dhe që ne kemi arritur ta çajmë vetëm pjesërisht, sidomos në zonat që kanë interes zhvillimi turistik, aty ku krimi i organizuar përpiqet të shpëlajë paratë e pista, por nuk do t’i gëzojë. Çfarë kanë grabitur, nuk do ta gëzojnë”, deklaroi ai.
