Kreu i partisë Lëvizja Demokratike Shqiptare, Myslim Murrizi, tha se ka shumë ambicie për zgjedhjet e ardhshme të 25 prillit 2021 dhe se do të ketë kandidatët e tij në të 12 qarqet.
Në një intervistë për Report Tv, Murrizi tha se vetë do të kandidojë në Tiranë, Fier, Elbasan, ndërsa është ende në pikëpyetje mes Korçës dhe Durrësit.
“50 ditë para zgjedhjeve ku të regjistrohet partia në KQZ sipas ligjit do të bëhet publike edhe lista e deputeteve që do të garojnë në 12 qarqe. Partia LDSH do kandidoj në të 12 qarqet dhe kam ambicie për çdo qark, unë do të luaj fort me njerëz që nuk janë etiketuar si xhepista, tenderista etj. Emri i Myslim Murrizit do të jetë në Fier, Tiranë, Elbasan dhe janë Korçë ose Durrës”, tha Murrizi.
Lidhur me lajmin e ngritjes së Gjykatës Kushtetuese me 6 nga 9 anëtarë, Murrizi tha se është lugë boshe pasi u ngrit për t’i bërë qejfin ndërkombëtarëve dhe çdo gjë e nxituar nuk ka vlerë.
“Unë nuk jam nga ata që rrahin daullet, nuk është në ditët e veta normale, është shtatanik si çdo gjë që lind pa plotësuar ciklin dhe duke shkelur çdo procedurë. Kuvendit i erdhi një kandidat, kur neni 125 i Kushtetutës thotë hapur se duhet të jetë 3 të renditur nga KED. Çdo gjë që bëhet me nxitim për teka apo egot të kujtdo qoftë të brendshëm dhe të jashtme janë pa rezultat të madh. Edhe ndërkombëtarët nuk duhet të luajnë me plane kooperativiste 6 mujore apo 5-vjeçare si qoftë largu i komunizmit. Gjykata Kushtetuese nuk do të bëhet kurrë me 9 anëtarë edhe për 5 vite të tjera, se 3 anëtarët do i zgjedh Gjykata e Lartë që nuk ka filluar ende të krijohet. Parlamenti nuk mund të shkelë Kushtetutën me urdhër të kurrkujt”, u shpreh Murrizi.
