Kryetari i grupit Demokrat në Kuvend, Myslym Murrizi, tha se aktorët politikë janë tallur me ish-të përndjekurit.
Gjatë fjalës së tij në Kuvend, Murrizi tha se deri më tani nuk është marrë asnjë vendim për ta. Ai e ka konsideruar absurd dëmshpërblimin për ish-të përndjekurit.
“Mos i detyroni të shtyhen në radhë. Mjafton të ulni pak dozën e kilometrave me milionat llahtar të eurove. Mjafton të mos jeni kapriçozë me cilindo qytetar dhe besoj që ajo pjesë e fundit e ish-të përndjekurve politikë që është ende gjallë dhe trashëgimtarët e parë të tyre të marrin atë që nuk ua kthen lirinë por nuk i lë endacakë rrugëve.
Prej vitesh flitet në emër të antikomunizmit në këtë sallë e jashtë. Më shumë trashet gjuha për antikomunizëm sa herë vijnë zgjedhjet. Është qesharake kur partitë që kanë ardhur në këtë vend pas pluralizmit nuk iu dhanë antikomunistëve atë që prisnin, nga ai subjekt që i dhanë gjithçka pasi dolën nga prangat e diktaturës.
Është absurde që njeriu që ka dhënë gjënë më sublime, jetën të marrë dëmshpërblim sa për 8 vjet burg.
Minimalja të paktën duhet të ishte 25 vite burg dëmshpërblim. Ndarja me këste 2-3 milion të vjetra, humbja vit pas viti e jetëve të vuajtura në këto kampe, buxhet i cunguar dhe tallje me letra me vlerë, përllogaritje për t’u zbritur kapanone, reparte, t’ia zbresësh nga dëmshpërblimi duke e llogaritur me 600-800 euro metri si pallat brenda unazës.
Ata nuk morën asgjë. Dyqanet, restorantet, klubet ua falën atyre, t’i gëzojnë ata që i kanë. Kush i kishte, pjesa më privilegjuar e atij regjimi. Ata që përveç rrogës merrnin dhe 1200 lekë si bashkëpunëtorë të sigurimit të shtetit. Këta që ishin nëpër burgje, rreth 80 mijë shqiptarë burra e gra ta pafajshëm gëzuan vetëm brohoritjet në shesh që u përmbys regjimi dhe do merrnin dhe një dëmshpërblim moral.
Është e vërtetë që ju në qeverisjen tuaj që s’e keni detyrim moral por shtetëror, keni dëmshpërblyer ndoshta dhe më mirë nga paraardhësit tuaj. Çfarë është e mundur të bëhet, të gëzojnë dhe të marrin ato letra e kupona që kanë në xhep. Mos i detyroni të shtyhen në radhë. Mjafton të ulni pak dozën e kilometrave me milionat llahtar të eurove.
Mjafton të mos jeni kapricozë me cilindo qytetar dhe besoj që ajo pjesë e fundit e ish-të përndjekurve politikë që është ende gjallë dhe trashëgimtarët e parë të tyre të marrin atë që nuk ua kthen lirinë por nuk i lë endacakë rrugëve. Të shihej dhe gjaku i 6 mijë shqiptarëve të pafajshëm të vrarë nën diktaturën e proletariatit”, tha ai.
