Dy deputetët e opozitës parlamentare Myslim Murrizi dhe Halit Valteri kanë propozuar ndryshime të reja në Kodin Zgjedhor.
Ata kanë sot në Kuvend një draft, i cili sipas tyre synon një sistem me lista të hapura. Në këtë draft mësohet të jenë propozuar 2 ndryshime. Njëri prej propozimeve ka të bëjë me numrin e kandidatëve në listën shumemërore të partisë.
“Numri i kandidatëve në listën shumemërore të një partie nuk duhet të jetë më i vogël se numri i mandateve për Kuvendin, apo ato të Këshillit vendor përkatës dhe nuk mund të jetë më i madh se 10% më shumë nga numri i mandateve që do të zgjidhen për Kuvendin apo numrit të mandateve për këshillin vendor përkatës”, thuhet në draftin e siguruar nga Panorama.
Ndërsa ndryshimi tjetër i propozuar ka të bëjë me mënyrën e zgjedhjes së kandidatëve të partive.
“Kandidatët e partive zgjidhen mbi bazën e numrit më të madh të votave të vlefshme të fituara prej tyre. Renditja e tyre vazhdon deri sa është numri i mandateve nominale të partisë politike”, thuhet më tej në draft.
