Presidenti i vendit Ilir Meta rikujtoi para Komisionit Hetimor mbledhjen që ai ka bërë të Këshillit të Sigurisë Kombëtare para një viti, me shqetësimin se mund të përsëritej një vjedhje e bankave në Rinas. Sipas tij, nevojitej mbledhja e veçantë për ta parandaluar, teksa shtoi se çdo vonesë mund të sillte pasoja dhe të avanconte krizën.
“Mund t’ju them se nuk është sekret se me përgjegjësi shumë të madhe e kam mbledhur Këshillin e Sigurisë para një viti, se kisha shqetësim që mund të përsëritej një vjedhje e bankave në Rinas, si ka ndodhur, pyesni Xhafaj dhe Gjiknurin, dhe për të parandaluar këtë u bë mbledhje e veçantë, u dhanë porositë të veçanta, dhe kjo ka ndodhur, 30 minuta pasi presidenti të zbriste nga avioni. Kështu që nuk mund ta ndaja këtë, çdo vonesë mund të sillte pasoja dhe të avanconte krizën”, tha Meta.
Ndërkohë, Meta ka dhënë shpjegime lidhur me pyetjen e drejtu7ar nga deputetja Vasilika Hysi, se çfarë masash kishte marrë pasi u informua se në mitingun e 8 qershorit të opozitës do të kishte incidente e gjakderdhje.
“Kryeministri ka qenë në fushatë, unë kam qenë në Gjermani, në datën 8 kur kam marrë vendimin, kam telefonuar kryetarin e Kuvendit për ta ndarë këtë vendimmarrje me të, por ai ka qenë në Tepelenë për një angazhim, kështu që një çështje e tillë përveçse me ekipin tim të sigurisë kombëtare nuk mund ta ndaja me askënd tjetër. Çdo vonesë mund të sillte pasoja dhe të avanconte krizën”, shtoi presidenti.
