Presidenti Ilir Meta ka pritur ditën e sotme në zyrën e tij, 2 qytetarët nga Kavaja të cilët neutralizuan një shtetas të armatosur në qendër të qytetit.
Përmes një postimi në Facebook, Meta falenderon shtetasit Ymer Xhafa dhe Bajram Shala, teksa shton se vendit i duhen më shumë shembuj të tillë frymëzues për të qëndruar larg konflikteve dhe dhunës.
Kujtojmë se qyteti i Kavajës u trondit 2 ditë më parë, kur Fitim Boqi qëlloi me breshëri kallashnikovi shtetasin Rexhep Tare në mes të qytetit.
Postimi i plotë:
Kënaqësi e veçantë të takoja sot dy qytetarë të mrekullueshëm të Kavajës, z.Ymer Xhafa dhe z.Bajram Shala, të cilët dy ditë më parë rrezikuan jetën e tyre për të neutralizuar një shtetas të armatosur në qendër të qytetit, i cili plagosi një shtetas tjetër, ngjarje që mund të kthehej në një tragjedi të madhe.
I falenderova përzemërsisht për aktin e tyre të lartë qytetar, në mbrojtje të jetës, paqes sociale dhe sigurisë publike.
Shembuj të tillë frymëzues i duhen mbarë shoqërisë tonë, për të qëndruar larg konflikteve, dhe për të reaguar kundër dhunës, krimit por dhe indiferencës, që rrezikon jetën, pronën e sigurinë qytetare.
