Deputeti Adriatik Alimadhi ka folur në lidhje me gjendjen e tij shëndetësore, pas shërimit nga koronavirusi.
I ftuar në emisionin “Shqipëria Live” në Top Channel, Alimadhi bën me dije se ndodhet ende i shtruar në spitalin “Shefqet Ndroqi”, i emërtuar ndryshe edhe si “COVID-2”.
Në dy testet e fundit ai ka rezultuar negativ, por pavarësisht kësaj deputeti ndodhet akoma në spital prej 35 ditësh.
Alimadhi tha se virusi i ka dëmtuar mushkërinë dhe se i duhet diku te 3 deri në 6 muaj për t’u rikuperuar. Më tej, deputeti sugjeron që pacientët të mbahen më shumë nëpër spitale, edhe nëse rezultojnë të shëruar nga sëmundja. Pasi sipas tij, komplikacionet mund të shfaqen edhe pas sëmundjes.
“Gjendja ime po analizohet. Sot u bënë 35 ditë që jam në spital. Mendoj se kjo është një eksperiencë që më ndodhi mua dhe këtë do e tregoj për të gjithë shqiptarët. Ka dalë në modë tashmë që COVID-19 del pas 15 ditësh. Mbajtja gjatë e imja në spital, tregon gjendjen time. Ndoshta dhe stafi e mjekët, mendonin se virusi largohet për dy javë tre javë. Por në momentin që kaluan tre javë gjendja ime u përkeqësua. Unë erdha në reanimacion dhe secili nga mjekët bënë të gjithë punët e tyre. Testi për COVID-19 më ka dalë negativ mbi pesë herë. Virusi ka hyrë në mushkri, ka gërvishtur mushkëritë e mia. Do të rikuperohen dëmtimet dhe dëshiron pak kohë më shumë, diku tek tre muaj deri 6 muaj për t’u shëruar. Analizat që unë kam bërë, ka dalë negative. E kam ndjerë nga solidariteti që ata kanë shprehur ndaj meje. I jam mirënjohës të gjithëve. Mesazhi im është i qartë, ruhuni nga virusi, ruani të moshuarit, familjet është shumë e rrezikshme. Është si një virus që dëshiron të bllokojë të gjitha organet e brendshme. Isha në një situatë, jetë a vdekje. Por edhe nga vullneti im e mposhta këtë betejë”, tha ai.
