Një grup motoristësh nga Serbia janë nisur drejt Kosovës. Para takimit, ata janë pritur nga nënkryetari i Kuvendit Komunal të Beogradit, Goran Vesiq, shkruan lajmi.net.
Të njëjtit konsiderohen si një grup mjaft i gjerë dhe me prirje për shkaktimin e trazirave. Shpesh herë, ky grup nga mediat në Serbi është cilësuar si grup kriminal.
Mirëpo ky grup nuk mund të hyjë në territorin e Kosovës. Kështu ka konfirmuar për lajmi.net Jetlir Zyberaj, këshilltar i ministrit të Jashtëm, Behgjet Pacollit. Ai ka thënë se Kosova nuk e lejon asnjë grup të organizuar që pretendon prishjen e rendit publik.
“Kosova është vend ku respektohen të drejtat e njeriut për dallim prej shtetit të Serbisë, megjithatë Kosova nuk lejon asnjë grup të organizuar që pretendon prishjen e rendit publik, pamarrë parasysh etninë”, ka bërë të ditur Zyberaj.
Detaje të tjera nëse ky grup ka mbërritur në kufi ende nuk dihen.
