Pas motit kryesisht të vranët në orët e mëngjesit në të gjithë territorin, tashmë dielli dhe kthjellimet janë ato që dominojnë. Në zonën e jugut, vranësirat mbeten prezente mesatare deri të dendura dhe shoqëruar lokalisht me reshje shiu me intensitet të dobët. Por edhe në këtë zonë, me kalimin e orëve vranësirat do të shpërbëhen dhe moti do të jetë kryesisht me kthjellime.
Për shkak të orëve me diell, sot temperaturat patën rritje në vlerat e mesditës, duke arritur në relievet malore 11ºC, në ato të ulta 16ºC dhe ato bregdetare 17ºC.
Edhe nesër pritet të jetë një ditë e bukur dhe me diell, pavarësisht se duke nisur nga orët e pasdites do të ketë shtim vranësirash mesatare deri dhe të dendura. Këto vranësira në zonën e qendrës dhe atë të veriut do të shoqërohen me reshje shiu të dobëta, në formë pikash dhe të lokalizuara.
Temperaturat e mëngjesit do të pësojnë rënie dhe parashikohen nga -4ºC në relievet malore deri në 5ºC në ato bregdetare. Në mesditë pritet një rritje e lehtë e tyre, duke u parashikuar nga 12ºC në zonat malore deri në 18ºC në ato bregdetare.
