Opozita ditën e sotme ka bllokuar 12 akse rrugore, duke paralizuar qarkullimin në vend. Sipas opozitës kjo është mosbindje civile për të larguar Ramën nga pozita e kryeministrit dhe për të sjellë një qeveri tranzitore.
Basha me aleatët e akuzojnë qeverinë Rama se ka ardhur në pushtet duke blerë votën dhe se është e kapur nga krimi. Kryetarja e LSI-së, Monika Kryemadhi ndodhet në Durrës, ku është duke udhëhequr protestën. Ajo është shprehur se pas rrethimit të Parlamentit dhe bllokimit të akseve rrugore, javën tjetër opozita nuk e di se si do të reagojë.
“Është kapur shteti dhe çdo segment. Vota është duke u blerë nga paratë e krimit. Mungesa e Gjykatës Kushtetuese është mungesë e lirisë dhe mungesa e lirisë sjell diktaturë. Dëshiroj të shoh një reagim nga PS për ta kthyer PS në shinat e vlerave njerëzore. Përshkallëzimi nuk është mirë për asnjë parti, as për shqiptarët. Sot shqiptarët dhe jo opozita janë të gatshëm për ti dhënë fund këtij genocidi heshtës që është duke bërë Edi Rama. Shqipëria sot ka mbi 500 mijë të shpërngulur, një genocid i heshtur që në vendet e botës ka sjellë revoltë. Opozita nuk ka synim të pushtojë institucionet dhe rrugët, por zemrat e shqiptarëve.
Ajo që dua të them është se ne do të bëjmë çdo lloj lëvizje politike, për ti treguar Edi Ramës se nuk e merr në dorë dot popullin shqiptar. Po i provojmë të gjitha për të treguar se jemi të përgatitur për të gjitha, edhe për të rrethuar Parlamentin, edhe për të bllokuar akset. Javën tjetër nuk i dihet çfarë do të ndodhë”, u shpreh Monika Kryemadhi.
