Guvernatori i Bankës së Shqipërisë, Gent Sejko, ka reaguar pas letrës që kryetari i opozitës, Lulzim Basha, u dërgoi bankave të nivelit të dytë dhe atij personalisht, për të mos financuar Partneritetet Publik Private (PPP).
Në një dalje publike, Sejko tha se janë zhvilluar kontrolle ndaj të gjitha bankave të nivelit të dytë, ndërsa shtoi se Banka e Shqipërisë do të mbikëqyrë vazhdimisht proceset.
“E kemi theksuar se ne si Bankë e Shqipërisë kemi bërë të gjitha kontrollet ndaj bankave të nivelit të dytë. Ne kemi vendosur rregullore për bankat e nivelit të dytë, si dhe ka rregullore edhe për të gjitha partneritetet mes shtetit dhe PPP. Lidhur me pastrimin e parasë, Banka e Shqipërisë ka rregulloren e saj. Edhe bankat vetë kanë ligje strikte për të parandaluar krime të tilla. BSH ka rolin e mbikëqyrjes. Ne si BSH do të mbikëqyrin vazhdimisht proceset, sikundër edhe institucionet që kanë këtë rol”, deklaroi Sejko.
Sejko foli edhe rreth lojërave të fatit, duke u shprehur se mbyllja e tyre ka pasur një efekt të vogël negativ në ekonomi.
“Kursi i këmbimit është shfaqur më efektiv se sezoni i kaluar. Euro vazhdon të jetë mbizotëruese ndaj lekut. Mbyllja e lojërave kanë pasur ndikim në rënie, e këtu kemi elementë edhe informal, por gjithsesi ka ndikuar disi negativisht në ekonomi”, tha ai.
