Në Komisionin për Punën dhe Çështjet Sociale dhe Shëndetësinë po diskutohet për projektbuxhtein për vitin 2023, ndërsa e pranishme është Ministrja e Shtetit për Fëmijët dhe Rininë, Bora Muzhaqi. Gjatë diskutimit Grida Duma drejtuar ministres Bora Muzhaqi tha se duhet të shpjegojë se çfarë masash janë marrë për të parandaluar ikjen e të rinjve. Ministrja e Rinisë, Bora Muzhaqi ishte para këtij komisioni duke raportuar në lidhje me pjesën e projektbuxhetit, e cila prek rininë. Gjatë raportimit të saj, Muzhaqi preku edhe buxhetin e Ministrisë së Arsimit duke theksuar se sektori që ajo mbulon përfshihet edhe në sektorë të ministrive të tjera, gjë e cila bëri Grida Dumën të reagojë.
Duma: Nuk kuptoni rolin tuaj
Muzhaqi: Unë e kam të qartë rolin tim
Duma: Më shumë se 40 mijë të rinj i mungojnë Shqipërisë për 5 vjet. Si e adresoni ju këtë problem për rininë? Kjo është çështja që u ngrit. Rinia po e lë këtë vend. Është ulur lindshmëria dhe kanë ikur të rinjtë. Ju si e adresoni këtë problem?
Muzhaqi: Masat që kemi parashikuar fillojnë tek forcimi i mekanizmave në nivel qendror dhe vendor, për të garantuar pjesëmarrjen e të rinjve dhe të rejave. Kemi kërkuar konsultime me organizata rinore, sa i përket ligjit të vullnetarizmit dhe jemi në pritje nga ky Komision.
Duma: Si thatë?
Muzhaqi: Po e përsëris për ta rikujtuar
Duma: Jo, jua kemi rikujtuar ne
Muzhaqi: Por nuk na ktheni përgjigje
Duma: Sepse nuk jemi Ministri me portofol. Ju prisni si Ministri që ky Komisioni t’ju takojë ju me grupet e biznesit? Procesin e dëgjesës e kemi bërë dy herë. Si Ministre e Shtetit keni punë të vështirë, sepse nuk jeni dot ekzekutive. Që i kërkoni këtij Komisioni që juve t’ju marrë grupet e interesit këtu!? Nuk di.
Muzhaqi: Herën e fundit më keni thërritur mua. Ne kemi për detyrë të bëjmë komente
Duma: Ka kaluar koha e komenteve. Ju duhet të ktheni përgjigje këtu. Duhet ta keni të qartë rolin tuaj
Muzhaqi: E kam shumë të qartë.
Duma: Nëse e keni të qartë mos e ngatërroni veten.
