Deputeti i zgjedhur i Partisë Demokratike, Agron Shehaj i cili nuk arriti të fitonte zgjedhjet për kreun e partisë, deklaroi se mijëra demokratë, nuk kanë mundur të votojnë në votimet e së dielës më 13 qershor.
Deklarata e Shehajt u bë mbrëmjen e sotme në emisionin ”Opinion” në Tv Klan. Sipas tij, se 15% i votave nuk reflekton mbështetjen që ai ka brenda partisë.
Ndër të tjera, Shehaj u shpreh se vëzhguesit etij nuk kanë patur mundësi të verifikojnë se kush ka votuar.
Agron Shehaj: ”Rezultati është i qartë, Basha vazhdon të jetë kryetari i PD. Sigurisht 15% nuk reflekton mbështetjen që unë kam në anëtarësinë e PD-së. Ka patur paregullsi, sidomos ato që kanë ndodhur gjatë ditës së votimit kanë qenë të lidhura me faktin që me dhjetëra-mijëra demokratë nuk kanë mundur të votojnë dhe vëzhguesit e mi nuk kanë patur mundësi të verifikojnë se kush ka votuar.”
Demokratët votuan Lulzim Bashën për të udhëhequr PD-në edhe për 4 vitet e ardhshme. Basha është më i votuari ndër 3 kandidatët e tjerë që e sfiduan për të drejtuar partinë më të madhe në opozitë. Ai ka siguruar mandatin e tretë në krye të partisë së dytë më të madhe në vend, me rreth 81% të votave.
Basha mori 81% të votave ose 32.882 në total në të gjithë vendin. Pas tij më shumë vota grumbulloi Agron Shehaj, 6038 vota. Edit Harxhi mori 991 vota, ndërsa Fatbardh Kadilli 763 vota. Në total në të gjithë degët e PD-së votuan 41.095 anëtare ose 54.7% e totalit.
