Pasditen e sotme në qytetin e Shkodrës ka pasur përplasje të ashpra mes protestuesve të PD-së dhe policisë dhe për pasojë kanë mbetur të lënduar tre persona mes tyre edhe një foshnjë njëmuajshe.
Ndërkohë nga ana tjetër, Rama nuk e anuloi takimin elektoral të tij, por thjesht e shtyu atë me 15 minuta. Rama u prit nga kandidati për kryetar i bashkisë, Valdrin Pjetri, Senida Mesi ish-zv/kryeministre dhe mbështetës.
Kujtojmë se pak më herët Bashkia e Shkodrës iu përgjigj degës vendore të Partisë Socialiste dhe policisë vendore se, në zbatim të dekretit të Presidentit Meta për anulimin e zgjedhjeve të 30 qershorit, nuk jep leje për zhvillimin sot të tubimit elektoral të socialistëve në një nga sheshet e këtij qyteti. Në përgjigje të kësaj, Kryeministri Rama me këmbëngulje mbajti takimin.
Përplasje të forta pati në qytet, ndërsa qindra forca speciale kishin rrethuar sheshin ku u zhvillua takimi elektoral. Policia përdori disa herë gaz lotsjellës për të shpërndarë protestuesit. Ndërkohë në këtë video duket momenti kur Rama arrin në qytet.
Ai zbret nga një makinë fuoristradë, ndërsa e shoqëronin mbi 15 truproja dhe krah tij ishte edhe deputeti i përjashtuar nga PS-ja, Tom Doshi, i cili doli deputet nga lista e PSD-së. Ai ka shkuar drejt podiumit ku mbajti fjalim në takimin elektoral pa asnjë incident.
