Ende nuk ka një datë se kur mund të dalë një vaksinë, ndërsa shumë është aluduar në këtë drejtim. Mjeku Arban Domi që punon në SHBA, ka shuar shpresat për një vaksinë kundër COVID-19. Në një lidhje direkte me emisionin “Opinion”, ai tha se vaksina mund të dalë vetëm në fund të vitit të ardhshëm.
“Mund të jetë gati në mes të vitit të ardhshëm, por më e sigurt është në fund të vitit dhe nëse del vaksina do bëhet në mënyrë selektive”, u shpreh ai.
Mjeku Domi u shpreh se vaksina dhe nëse del, duhet të bëhet çdo vit njësoj si e gripit, pasi virusi do jetë gjatë prezent.
“Është shpejt për të qenë e gatshme, ka një anë pozitive që po punojnë dhe etapat po kalojnë shumë shpejt. Por vaksina ka dy elementë, që duhet t’i përmend. Nuk ka asnjë vaksinë për viruse të ngjashme, për viruse me ARN. Nga ana tjetër, vaksina ka efikasitetin dhe sigurinë”, tha Domi.
Dje u raportua se kishte humbur jetën një vullnetar që kishte injektuar vaksinën anti-COVID të AstraZeneca. Vullnetari mendohet të ketë zhvilluar inflamacion të palcës kurrizore, i njohur ndryshe si mielit transversal.
Lajmi është bërë i ditur nga Universiteti i Sao Paolos, ndërkohë që kompania që ka prodhuar vaksinën, ende nuk ka dhënë një deklaratë zyrtare lidhur me rastin.
AstraZeneca është një nga katër prodhuesit e ilaçeve të mbështetura nga SHBA, për prodhimin e një vaksine anti-COVID. Vaksina e prodhuar prej tyre është quajtur AZD1222 dhe përdor material gjenetik nga koronavirusi me një adenovirus të modifikuar.
