Mjeku kardiolog i QSUT-së, Edin Prifti ka thyer heshtjen dhe ka folur për herë të parë pas akuzave në drejtim të tij nga SPAK.
Në lidhje me paratë e sekuestruara në banesë, Prifti tha se shuma ishte e bashkëshortes së tij, pas një kontrate shit-blerje me të motrën.
Edin Prifti: “Kjo është një kërkesë që bëri prokurori i çështjes, që bazohej në faktin e një sasie të ardhurash, që u gjendën në shtëpinë time dhe e konsideroi të arsyeshme një ashpërsim të masës në arrest me burg. Sigurisht që pasi ai e kërkoi këtë, ne paraqitëm gjithë dokumentacionin që këto janë të ardhura të ligjshme me një kontratë të bashkëshortes sime të shit-blerjes së një prone. Unë kam qenë në dijeni të këtij procesi, sepse vetë SPAK dërgoi njerëz që më datë 9 për të sekuestruar kartelat. Isha në dijeni, sepse i kam konsideruar gjithçka që kam në jetën time të ligjshme, me nder dhe me punën që kam bërë.”
Mjeku akuzoi edhe kryeministrin Edi Rama, pasi ky i fundit deklaroi disa minuta më parë se mjeku ishte në burg. Sipas tij, kryeministri i dha një urdhër prokurorisë për ta burgosur atë, ndaj edhe nga vendimi i gjykatës pret që të burgoset.
Edvin Prifti: “Ajo çfarë është për tu shqetësuar është që drejtësia të marrë vendimin e duhur në bazë të provave dhe kam besim që drejtësia mund të funksionojë. Kryeministri sot dhe segmente të caktuara të poltikës kanë deklaruar se unë jam i arrestuar dhe me sa duket unë po shkoj drejt arrestimit tim. Këto deklaratat e kryeministrit duhet t’i komentojë gjithë publiku, në rast se nuk ka qenë dijeni por besoj në institucionet e vendit tim. Në rast të kundërt mund të ketë dhe një urdhër dhënë ndaj gjyqësorit”.
Për çfarë akuzohet Edvin Prifti
Hetimet ndaj tij nisën bazuar në përgjimet e sekretares së Gjykatës së Krujës, të cilat kishin nisur për lirimin e të dënuarve por që kanë zbuluar për Prokurorinë e Posaçme edhe korrupsionin në shëndetësi.
Nga përgjimet, ka rezultuar se sekretarja e Gjykatës, Manuela Mallkuçi, i ka dhënë para kirurgut Edvin Prifti, me qëllim që ky i fundit të bënte operacion nënën e saj.
Kontrolli i kryer pasditen e të enjtes, 11 shkurt në banesën e tij zbuluan 250 mijë euro dhe 16 milionë lekë në zyrën dhe banesën e kardiologut të njohur.
