Shumë studime të ndryshme janë realizuar në lidhje me koronavirusin, e ndërsa u pretendua se me rritjen e temperaturave do të ulej edhe numri të infektuarve. Deri më tani ende nuk ka asgjë zyrtare në lidhje me atë se çfarë mund të pritet me rritjen e temperaturave, për sa kohë kemi një fluks të të infektuarve.
Por shefi i Laboratorit të Mikrobiologjisë në QSUT, Andi Koraqi, ka zbuluar një detaj të ri që nuk është hasur më parë. Sipas tij, koronavirusi transmetohet në ujërat e ëmbla, ndaj këshillon që të mos përdoren pishinat.
Ai u ka kërkuar qytetarëve që të tregohen të kujdesshëm gjatë pushimeve, pasi COVID-19 përhapet përmes ujërave të ëmbla.
“Nuk ka asnjë të dhënë se virulenca ndikohet nga temperatura e lartë, mbetet me të njëjtën virulencë si në fillim.
Që të themi se është ulur virulenca, virusi duhet të ketë pësuar mutacion, pra të jetë krijuar një virus i ri. Coronaviruset janë viruse që kontaminojnë edhe ujërat”, tha mjeku në një intervistë për ‘euronews’.
“Ka të dhënë sporadike se nuk përhapet përmes ujërave të kripura, por përhapet përmes ujërave të ëmbla. Duhet pasur kujdes nga pishinat. Rreziku në plazh është rreziku i grumbullimeve të mëdha. Si pasojë e rritjes së temperaturave dhe uljes së lagështirës mund të jetë ulur transmetueshmëria, por asnjëherë virulenca”, shtoi më tej ai.
