Gazetari Erjon Skëndaj, i pranishëm në emisionin “Kjo javë” në “News 24” ka folur rreth situatës problematike në të cilën ndodhet mjekësia.
Ai u shpreh se ka pyetur studentë të mjekësisë në vitin e 5-të dhe, 8 nga 10 prej tyre shprehen se do të kin në Gjermani, për shkak se këtu nuk shohin shpresë.
“Kam pyetur studentë të mjekësisë në vitin e 5-ë. Tetë nga 10 më kanë thënë se do të ikin në Gjermani. Ky është alarm i madh. Ata ikin në Gjermani për tjetër specializim. Qeveria shqiptare duhet të ndërgjegjësohet për këtë fenomen dhe t’i vërë gishtin kokës”, tha Skëndaj.
Skëndaj tha se qeveria shqiptare duhet ta shohë mirë këtë situatë të rënduar me të cilën po ndeshet vendi ynë.
Ndër të tjera, gazetari u shpreh se pranohen specializantë me mesatare të ulët, me 5 ose me 6, ndërsa shtroi dhe problemin se specializantët punojnë roje nate dhe nuk paguhen.
“Ka specializantë që janë pranuar me notë mesatare 5 ose 6. Nga 300 specializantë që pranohen, 50 janë me mesatare 5 dhe 6. Di gjithashtu se ka specializantë që rrinë roje nate dhe nuk paguhen dhe kjo është e tmerrshme”, tha Skëndaj.
