Spitalet dhe qendrat shëndetësore kanë mungesë të theksuar të mjekëve, ndërsa kryeministri Rama vijon të bëjë spektakël mediatik në lidhje me prezantimin e portaleve për infermierë, ashtu siç veproi me përzgjedhjen e mësuesve për Shqipërinë, një proces i tillë që nuk kaloi pa rezerva dhe kritika të forta. Të dhëna e fundit tregojnë se mjekët dhe infermierët po “arratisen” në drejtim të vendeve perëndimore, pasi kanë mundësi më të mira punësimi dhe pagesash.
Deklaratat e sotme të Ramës, kritikohen nga përfaqësuesit e infermierëve të cilët ngrenë dyshime për mënyrën e funksionimit të këtij portali. Kjo skemë sipas tyre, nuk e zgjidhë problematikën me të cilën përballen mjekët apo infermierët.
Kreu i Shoqatës së Infermierëve, Elson Juçaj thotë së hapja e këtij portali nuk është zgjidhje për papunësinë, por qasja e prezantimit tregon se niveli i të papunëve ka arritur majat.
“Në situatën që janë infermierët nuk duket e vendit një hapje e portalit sepse nuk është zgjidhje për papunësinë. Thjesht portali gjëja e parë që do veri në dukje është numri i madh i të papunëve që do jetë dhe sa sorollatje kanë kaluar ata. Edhe mënyra përmes portalit e përzgjedhjes së infermierëve për punësim nuk është se është shumë e drejtë sepse profesioni i infermierit nuk ka vetëm anën teorike, por ka të bëjë shumë edhe pjesa praktike e tyre. A do të ketë një komision të drejtë zgjedhje për profesionistët që do fillojnë punë dhe më kryesorja është, kjo gjë e shmang korrupsionin e punësimit apo jo?”-thote ai.
Kryeministri Rama tha më parë se do të punësohen qindra infermierë dhe zgjedhja e tyre do të behët mbi bazën e aftësive dhe kjo nuk do të influencohet aspak nga bindjet apo “shijet” politike.Për Ramën, perandoria e punësimit me miqësi politike ka marrë fund njëherë e mirë, por është aftësia ajo që do të japë rezultat.
Ai pohon se hapja e portalit është shmangie nga problemet reale që kanë punonjësit e mjekësisë duke nisur me pagat e ulëta, kushtet e punës, korrupsioni për të gjetur punë e deri te mungesa e aftësive profesionale, ku për çdo vit qindra të diplomuar në fakultete të ndryshmë të vendit licencohen për të dhënë shërbim.
“Pavarësisht ikjes, gjë që duhet të ishte shqetësimi i parë i Ministrisë, që pse po largohen kaq shumë, pse infermieri po ikën nga vendi i tij? Gjë që dihet që është mungesa e pagave të mira, kushtet e këqija të punës. Është turp në vendin tonë një infermier të paguhet me atë pagë që deri tani paguhet. Do të thotë që për ne hapja e portalit është thjesht një shmangie e fokusit nga problematikat kryesore. Infermier ka plot të papunë sepse ka aq shumë fakultete infermierie në vendin tonë të cilat nxjerrin çdo vit infermier. Sot fitojnë infermierinë 300 veta, diplomohen 300 dhe marrin licencë 300”-shprehet ai.
Problematikë tjetër që shqetëson punonjësit e shëndetësisë, është edhe kurrikulat studimore, pasi ajo që behët në Shqipëri nuk është e njësuar me praktikat mësimore të vendeve të tjera. Ai thotë se ka ngritur disa herë pranë institucioneve përgjegjëse, por nuk është gjetur asnjë rrugë bashkëpunimi dhe jo më zgjidhje.
Gjermania vendi më i preferuar për rininë e Shqipërisë të diplomuar në mjekësi. Ambasada gjermane në Tiranë ka dhënë gjatë vitit 2017 viza pune për 3.500 qytetarë nga Shqipëria. Në Qendrën Goethe të gjermanishtes në Tiranë, partnere e Institutit Goethe, është rritur me ritme të shpejta kërkesa për të mësuar gjuhën gjermane.
Drejtorja e kësaj qendre Petra Behlke-Campos thotë për DË se numri i kursantëve është dyfishuar që nga viti 2013 , kurse numri i pjesëmarrësve në provime është trefishuar. Ligji gjerman, që hyri në fuqi në janar të vitit 2016, sipas të cilit qytetarët e vendeve të Ballkanit Perëndimor, mund të marrin leje qëndrimi për të punuar dhe jetuar legalisht në Gjermani, nëse kanë një kontratë pune me nje kompani private apo strukturë publike hapi mundësi të mëdha për të emigruar në Gjermani.
Efekti i tij i menjëhershëm është rritja e jashtëzakonshme e kërkesave për të mësuar gjemanishten si një parakusht për të siguruar një kontratë pune. Burime zyrtare nga Ambasada gjermane në Tiranë pohojnë për DË se gjatë vitit 2017 kjo ambasadë ka dhënë viza pune për 3.500 qytetarë nga Shqipëria.
Ligji i sipërpërmendur i shoqëruar me njoftime në mediat gjermane për vende të lira pune, sidomos për mjekë dhe infermierë, po ushqejnë tek rinia shqiptare e diplomuar në mjekësi dëshirën për të emigruar dhe punuar në Gjermani. Ky trend tregon se mjekësia shqiptare është futur në një rreth të ngushtë, ku përpjekjet e politikanëve dhe lojërat mediatike për punësimin është një përpjekje e dështuar dhe e pa shpresë.
