Pasi u shpëtua nga kampi al-Hol në Siri, 11-vjeçari Alvin Berisha mbërriti shëndoshë e mirë në Itali. Në mediat e huaja qarkullojnë pamjet e mbërritjes së Alvinit në shtëpi.
Në ballkonin e shtëpisë së tij varej një çarçaf ku shkruhej: “Mirë se erdhe kampion”, dhe nën pallat e pritën familjarë të shumtë dhe fqinjë.
“Çfarë do të bëjmë tani? Do të festojmë me gjithë vendin për mbërritjen e kampionit”, tha babai i Alvinit.
Me mall dhe lot gëzimi, Alvini u prit dhe nga dy motrat e tij që prisnin me padurimin kthimin e 11-vjeçarit nga Siria.
Alvin Berisha ishte vetëm 6 vjeç kur nëna e tij Valbona e ndau nga familja, për ta marrë në Siri, pasi kishte vendosur ti bashkohej ISIS. Tragjedia do të bëhej edhe më e madhe, kur e ëma do të humbiste jetën së bashku me bashkëshortin e saj.
