Kryetarja e LSI-së, Monika Kryemadhi, ka treguar frikën e saj më të madhe se një ditë mund të mbetet e vetme. Mbrëmjen e djeshme, teksa ka qenë e ftuar në emisionin “Aktualitet” të Fax News, Kryemadhi tregoi për frikën se një ditë do të mbesë e vetme, pasi fëmijët i ka për studime jashtë. Teksa sillte në kujtesë disa raste, ku qytetarët për arsye të ndryshme emigronin, ajo bënte një krahasim me fëmijët. Kryemadhi tha se shpresat i kanë humbur se fëmijët do të kthehen në Shqipëri pas studimeve, pasi këtu mundësitë janë të pakta.
“Unë kam lëvizur shumë në Shqipëri, sepse që të fillosh të debatosh, duhet të dish edhe se çfarë ndodh, të kuptosh edhe mentalitetin e njerëzve. Kam qenë në shumë fshatra të Shqipërisë, sidomos në zonat e veriut.
Kam gjetur një djalë në moshën 14 vjeç në zonën e veriut. Ai kishte mamin e paralizuar, dhe do të ikte në Itali sapo të vinte pranvera. Dhe i thashë unë; po mamanë, ku do ta leshë? Do ta zbres tha te halla, në qytet.
Takova dhe një djalë tjetër që ishte si taksixhiu i Kalasë së Dodës, dhe ai nuk ikte dot, sepse kishte expuls dhe i duheshin edhe 2 vjet t’i përfundonte. Çfarë ka ndodhur? Duke biseduar me ta fillova të mendoja, ore se edhe mua fëmijët a do më vijnë, apo s’do më vijnë më? Se të mbarosh matematikë, nuk vjen më. Ku do shkojë, do vijë këtu të punojë mësues matematike? Kështu që do shkojë të gjejë, a do shkojë në Azi a në Afrikë, do kërkojë mundësitë e veta…
Do ngelem vetëm në shtëpi. Mirë unë që kam Ilir Metën, se ata si rracë rrojnë shumë nga 120 vjeç, xhaxhai dhe gjyshi i kanë vdekur të mëdhenj shumë (qesh). Por mos ta kem unë Ilir Metën, unë do vdes dhe do më harrojnë, do katandisem vetëm, s’do kem njeri të më hapë derën…Kur e kam unë këtë receptor që punon në mënyrë, që rri si çekan te koka, që nuk gjen një infermier, një mjek”, tha Kryemadhi.
