Në një komunikim online, Ministrja e Arsimit, Besa Shahini, zbuloi se viti shkollor 2019-2020 do të mbyllet për shkak të koronavirusit. Shkollat dhe universitetet në Shqipëri do të rihapen në shtator, ndërsa prej datës 9 mars të këtij viti, vijojnë të jenë të mbyllura për shkak të situatës së shkaktuar nga pandemia botërore, Covid-19. Ajo tha se është vendosur që të reduktohet puna e maturantëve. Më konkretisht, drejtorët e shkollave do të hartojnë një program të qartë, dhe në to nuk do përfshihen mësimet që janë bërë gjatë kohës së karantinës dhe kur është bërë mësimi online.
“Ky vit do të mbyllet në qershor 2020. Provimet e maturës shtetërore do të mbahen nga data 8-18 qershor 2020. Kjo na jep kohën që të përgatisim diplomat e tyre. Provimet e klasës së pestë dhe të nëntë do të anulohen. Provimet e lirimit nuk mbajnë të njëjtën peshë si provimet e maturës, prandaj kemi vendosur të marrim këtë vendim.
Në mënyrë që provimi i maturës të jetë sa më i drejtë, kemi vendosur që të hapim shkollat vetëm për 3 javë. Do të hapim shkollat vetëm për maturantët në 18 maj deri në 5 qershor. Në këtë periudhë do të punohet vetëm për lëndët e maturës shtetërore.
Mësimi nga shtëpia do të vazhdojë deri në fund të majit për klasat 1-11, pra 2 javë më herët se parashikimi që të lejojmë mësuesit që të shkojnë në shkolla dhe të bëjnë hedhjen e notave dhe kalkulimet përfundimtare.
Hapja e pjesshme e shkollave, do të zbatohet duke zbatuar rregullat e distancimit social. Arsyeja pse nuk mund të hapim të gjitha shkollat, është për shkak të numrit të madh të nxënësve që kemi në shkolla. Kështu kemi vendosur të hapim shkollat vetëm për maturantët, duke i shpërndarë në shkolla, për të respektuar distancën”.
