Ministrja e Punës dhe Politikës Sociale në Maqedoninë e Veriut, Rashella Mizrahi është shkarkuar ditën e sotme nga posti i saj. Ky vendim erdhi për shkak të shkak të mosrespektimit të Marrëveshjes me Greqinë për zgjidhjen e kontestit për emrin.
Kuvendi vendosi mëngjesin e sotëm me 62 vota pro për të miratuar propozimin e kryeministrit të Maqedonisë së Veriut, Oliver Spasovski për shkarkimin e ministres Mizrhai.
Ministrja e Punës dhe e Politikës Sociale, Rashella Mizrahi në disa paraqitje para mediave, kishte vendosur pas saj një pano me emrin e vjetër “Republika e Maqedonisë”.
Kjo gjë nxiti reagimin e ministrit të Punëve të Jashtme, Nikolla Dimitrov. Sipas tij, në lidhje me këtë ka ardhur edhe një notë proteste nga ana e Greqisë, e cila kishte tërhequr vërejtjet për pasoja të mundshme në rast se nuk respektohet Marrëveshja e Prespës.
“Ajo me këto veprime ka rrezikuar të ardhmen euroatlantike të shtetit tonë. Disa herë ia kam tërhequr vërejtjen por ajo nuk e korrigjoi këtë sjellje. Të gjithë duhet të respektojnë Kushtetutën dhe ligjin dhe institucionet duhet të funksionojnë në mënyrë të përsosur”, tha Oliver Spasovski.
Marrëveshja mes Shkupit dhe Athinës për zgjidhjen e kontestit shumëvjeçar të emrit është arritur më 17 qershor të vitit 2018. Më këtë marrëveshje, Maqedonia ka ndërruar emrin në Maqedonia e Veriut, ndërsa Greqia ka hequr veton për anëtarësimin e fqinjit të saj verior në institucionet euroatlantike
