Ministrja e Arsimit, Evis Kushi, ka vendosur pikat mbi ‘I’, ndërsa ka nënvizuar gjatë raportimit në Komisionin Parlamentar të Ekonomisë se nuk do të tolerohet më mësimi online. Ajo sqaroi se padiskutim që ka studentë të pa vaksinuar, por në asnjë mënyrë nuk mund të tolerohet mësimi online. Në raportimin që ajo bëri në Komisionin e Ekonomisë për buxhetin në arsim, u shpreh se disa universitete ja kanë kërkuar mësimin online, por Ministria e ka refuzuar. Ajo tha më tej se do të ngrihet një grup pune, në mënyrë që të mos ndodhë më që në universitete të zhvillohet mësimi online.
“Jam dakord që vaksinimi në universitete është i rëndësishëm. Ne e vendosëm si kusht vaksinimin e detyrueshëm ose test PCR.
Javën e parë kemi qenë në bashkëpunim me universitetet, për ta zbatuar këtë kusht. Mua më raporton rektori i Universitetit të Mjekësisë që mbi 90% e studentëve janë të vaksinuar. Ka akoma të pavaksinuar, jemi të vetëdijshëm për këtë, por ne në asnjë mënyrë nuk mund të tolerojmë mësimin online.
Menjëherë do të bëjmë verifikimet, sepse ka patur universitete që e kanë kërkuar dhe ne ia kemi refuzuar në mënyrë zyrtare. Zyrtarisht ne nuk kemi informacion, por ju falenderoj. Mësimi online vitin e kaluar ka qenë një sakrificë e madhe për universitetet tona, sidomos universiteti i Mjekësisë, Universiteti i Arteve apo Universiteti i Sporteve. Imagjinoni çfarë mësimi mund të bëjnë ata online. Për ne ishte emergjente hapja e auditorëve. Ju falenderoj për shqetësimin dhe do të gremë grupe pune që kjo të mos ndodhë në universitetet tona”, u shpreh ndër të tjera ministrja Kushi.
Ndërsa për rritjen e pagave të mësuesve, ajo u shpreh: “Ne jemi angazhuar që pagat e mësuesve do të rriten 40% brenda këtij mandati. E filluam vitin e parë dhe do vazhdojmë deri sa të përmbushim këtë angazhim. Ne mbështetjen nuk e kemi vetëm financiare për mësuesit, por e kemi edhe në mënyra të tjera. Po të shikosh investimet në shkolla, ato nuk janë vetëm për nxënësit, por edhe për mësuesit”.
