Grabitja e miliona eurove në aeroportin e Rinasit ka cenuar sigurinë kombëtare. Deri tani nuk ka asnjë të arrestuar për këtë ngjarje që ka tronditur shtetin shqiptar, e vetmja provë është grabitësi që mbeti i vrarë gjatë përplasjes me policinë, Admir Murataj.
Por për thyerjen e sigurisë në vendin që cilësohet si më i sigurti në territorin e në shteti deri më tani nuk ka përgjegjës, pasi qeveria ia ka faturuar koncesionarit dhe ky i fundit nuk ka pranuar. Ministrja e Infrastrukturës dhe Energjisë, Belinda Balluku thotë se përgjegjës kryesor për sigurinë e aeroportit e ka koncesionari.
“Për sigurinë e aeroportit mban përgjegjësi koncesionari, ai e delegon atë kompanive të cilave ai i përzgjedh. Të gjitha problematikat janë bërë të ditura, problematikat janë adresuar. Koncesionari ka marrë dijeni, koncesioneri në rastet më të shumta ka bërë përmbushje bazike dhe më minimale të këtyre problematikave”, tha Balluku në Opinion.
Por a ka përgjegjësi shteti?
“Shteti patjetër ka përgjegjësi për gjithçka ndodh në Republikën e Shqipërisë. Secili ka përgjegjësinë e vetë për fushën ku operon në biznes”, tha ministrja.
Sipas ministres Belinda Balluku nëse shteti do të vepronte do të kishte mbi supe një faturë të majme, pasi kontrata është në disfavor të shtetit shqiptar.
“Autoriteti i Aviacionit Civil duhet të ishte më agresiv sa i përket kompanisë ICTS Albania, e cila është një kompani problematike. Na ka shfaqur gjithmonë probleme, nuk ka kaluar testet e sigurisë për shumë raste. Por koncesionari kinez e ka mbrojtur me pathos sa herë kjo kompani është goditur me të drejtë”, tha ministrja, duke theksuar se vendimmarrja pas grabitjes së fundit do të jetë ekstreme.
