Ministri i Inovaconit dhe Ndërmarrësisë në Qeverinë e Kosovës, Besim Beqaj ditën e sotme ka njoftuar publikisht se i ka dorëzuar dorëheqjen kryeministrit të Kosovës Ramush Haradinaj.
Beqaj akuzohet për shkelje të statusit të barabartë të shtetasve dhe banorëve të Republikës së Kosovës dhe kjo është arsyeja se përse është dorëhequr.
Kujtojmë se dorëheqja e Beqajt vjen një ditë pas vendimit të kryetarit të Partisë Demokratike të Kosovës Kadri Veseli për largim nga detyra të të gjithë anëtarëve të kësaj partie politike, që mbajnë poste publike, por njëkohësisht janë të akuzuar nën dyshime për korrupsion dhe nepotizëm.
Përgjatë një konference për media Beqaj ka theksuar se vepra penale për të cilën është duke u gjykuar nuk ka elemente të veprës së korrupsionit: “Ju siguroj të gjithëve se kjo sfidë do të kalohet shumë shpejt dhe e vërteta do të dalë e pakontestueshme”.
