Rijeka ka mposhtur Milanin në Kroaci me rezultatin e pastër 2-0, për të thelluar akoma më shumë krizën tek kuqezinjtë e Gattusos. Një humbje mjaft e hidhur në Europë, që pasohet nga ai barazim dramatik në kampionat nga Benevento në minutën e fundit. Trajneri i Milanit, Genaro Gattuso kishte vendosur që në këtë takim t’i jepte hapësirë disa lojtarëve të rinj.
Milan e kishte siguruar më parë kualifikimin për në raundin tjetër si lider i grupit. Gjithsesi vendasit e Rijkas e nisën mirë ndeshjen kur kaluan në epërsi vetëm pas shtatë minutash lojë. Sulmuesi Jakov Pujlic shënoi shumë shpejt për vendasit një gol mjaft të bukur nga goditje dënimi. Milani përpiqet të reagojë, por tentativat e Cutrone dhe Biglias nuk patën sukses.
Pjesa e dytë nisi përsëri mirë për vendasit të cilët shënuan edhe një gol tjetër në portën e Storarit. Ishte sulmuesi kroat me pasaportë zvicerane, Mario Gavranovic që shënoi dy minuta pas fillimit të së dytës për 2-0. Milani nuk ka forcë të reagojë dhe të gjejë rrugën e rrjetës dhe kjo bën që ta mbyllë fazën e grupeve me humbje.
Ja si përfunduan të gjitha ndeshjet e orës 19:00 në Europa League. Ndërsa shorti i përballjeve direkte do të hidhet ditën e hënë në orën 13:00.
