Nga Durrësit, kreu i Shtetit, Ilir Meta, ka përcjellë mesazhe të qarta, duke kërkuar nga palët politike që të marrin përgjegjësitë për të zgjidhur krizën dhe situatën kaotike në vend. Po kështu, ai ka nënvizuar se vendi duhet të bëhet gati për zgjedhjet e 13 tetorit. Në fjalën e tij para mediave, Meta ka kërkuar nga Rama që të heqë dorë nga presionet dhe shantazhet, nga të gjitha institucionet.
“Sigurisht që 13 tetori dhe zgjedhjet, për zgjedhjet vendore nuk besoj se zgjidhin gjithçka, por është detyrim ligjor dhe Kushtetues i pa shmangshëm. Në radhë të parë është detyrim për kryeministrin që të heq dorë nga presionet dhe shantazhet nga gjithë institucionet e tjera, duke penguar zbatimin e këtij dekreti, dhe padyshim është përgjegjësi e gjithë të tjerëve të behen gati për të marrë pjesë në zgjedhjet vendore të 13 tetorit”, tha Meta, duke njoftuar se ka bërë gati për ti dërguar një letër Sekretarit të OSBE, por edhe kreut të ardhshëm të OSBE.
“Meqënëse Shqipëria përgatitet të marrë kryesimin e OSBE vitin e ardhshëm, i kërkoj për të negociuar me të dy palët, për një zgjidhje të shpejtë, pasi nuk kemi kohë. Jo vetëm për të parandaluar përshkallëzimin e situatës së pafavorshme për qytetarët, por edhe për një vend që duhet të jetë shembull për funksionimin e institucioneve demokratike”, tha ai.
Presidenti i mëshoi fort faktit se dialogu është alternativa e vetme për të kaluar këtë ngërç. “Kam insistuar për dialog të qëndrueshëm politik, jo për diversion, apo demagogji, por që të rivendoset normaliteti i demokracisë në vend dhe të funksionojë kontrolli e balanca mes pushteteve dhe llogaridhënia.
Kemi sot një shumicë që kontrollon gjithçka, një situatë jashtëzakonisht kaotike në gjithë drejtimet, dhe kjo është përgjegjësi e palëve politike në vend, nuk shfajëson asnjë edhe opozitën, se opozita i ka pasur të gjithë mundësitë për të parandaluar me propozime me këmbë në tokë, e të përgjegjshëm shumë nga marrëzitë që kanë ndodhur në drejtim të skenarit të qartë të kapjes së institucioneve në vend”, u shpreh Meta.
