Presidenti Ilir Meta ka vizituar ditën e sotme banorët e prekur nga tërmeti në zonën e Bubqit.
Përmes një postimi në Facebook, Meta shprehet se pasojat e tërmetit në këtë vend janë tronditëse. Ai shton se tashmë duhet punuar për rivendosjen e normalitetit të plotë.
“Pasojat e tërmetit në Bubq janë tronditëse, por fatmirësisht pa jetë të humbura. Tani është koha për të përballuar sa më mirë emergjencën, deri në rivendosjen e normalitetit të plotë”, shkruan ai në postimin e tij.
Kujtojmë se më herët ditën e sotme zëdhënësi i presidentit, Tedi Blushi, lajmëroi se Meta do të mbledhë të hënën Këshillin e Sigurisë Kombëtare.
