Presidenti Ilir Meta ditën e sotme ka takuar 90-vjeçarin Smajl Plangaj i cili mori pjesë më 2 mars në manifestimin e thirrur nga Kreu i Shtetit.
“Pa diskutim, qeveria do të ketë frikë nga POPULLI, dhe jo POPULLI nga qeveria”, shkruan ndër të tjera Meta në rrjetin social Facebook.
Reagimi i plotë i Metës: “Ishte kënaqësi të vizitoja sot në shtëpinë e tij në Postribë, zotin Smajl Plangaj.
Edhe pse po shkon drejt të 90 viteve, ai iu përgjigj thirrjes së Presidentit në 2 mars, për BESËLIDHJEN për Kushtetutën dhe Demokracinë.
“E kam për detyrë ta dua Atdheun, – më tha, “dhe nuk do presim derisa ta shkatërrojnë krejt që të ngrihemi për ta shpëtuar”. Mirënjohje z.Smajl, Postribës, Shkodrës dhe mbarë shqiptarëve, të cilët nisën PRANVERËN KUQEZI më 2 mars për të mos u ndalur deri në rivendosjen e plotë të rendit kushtetues dhe llogaridhënës.
Pa diskutim, qeveria do të ketë frikë nga POPULLI, dhe jo POPULLI nga qeveria!”
