Dje presidenti Ilir Meta priti në një takim delegacionin e nivelit të lartë të Kongresit të Autoriteteve Lokale dhe Rajonale të Këshillit të Europës. Me anë të një postimi në rrjetet sociale, kreu i Shtetit, Ilir Meta, ka sulmuar mazhorancën për 30 qershorin, duke deklaruar se u cënua demokracia me mbajtjen e zgjedhjeve. Ankesa e tij vjen jo rastësisht, pasi KiE vendosi të mos i monitoronte zgjedhjet e 30 qershorit.
Statusi
“Një takim i frytshëm me delegacionin e nivelit të lartë të Kongresit të Autoriteteve Lokale dhe Rajonale të Këshillit të Europës. Vlerësova angazhimin e tyre për monitorimin serioz të situatës në Shqipëri, duke theksuar se vendi ndodhet në një krizë sui generis përfaqësimi, dhe në çeikulibër të plotë të mekanzimave të kontrollit dhe balancës.
Votimet një partiake të 30 qershorit nuk i dhanë zgjidhje krizës, por cënuan rëndë edhe demokracinë vendore, duke e zhytur më shumë vendin në rrugën e paligjshmërisë dhe kapjes së shtetit. Kushtet e Bundestagut, janë pasqyra më e qartë e problemeve serioze me të cilat përballet vendi, por edhe harta më e sigurtë për rrugën europiane që duhet të ndjekë pa vonesë Shqipëria”.
Delegacioni i Këshillit të Europës po kështu u prit edhe nga kreu i Grupit të Përgjithshëm të PS, Taulant Balla. Pas takimit, Balla dha një deklaratë për mediat duke bërë me dije disa nga pikat kyçe që diskutoi me delegacionin e KiE. Mes të cilave edhe mungesa e tre kryebashkiakëve, të cilët u prekën nga ligji i dekriminalizimit. Për këtë, Balla i kërkoi presidentit që pas përfundimit të situatës emergjente (31 mars 2020), të dekretojë datën e zgjedhjeve.
Po kështu, kreu i grupit parlamentar të PS theksoi edhe njëherë se zgjedhjet në Shqipëri do të mbahen në 2021, ndërsa zgjedhjet vendore në 2023, duke i treguar opozitës së bashkuar se zgjedhje të parakohshme nuk do të ketë.
