Presidenti Ilir Meta gjatë konferencës për shtyp, deklaroi se kryeministri ka qenë në dijeni të vendimit të tij për shfuqizmin e dekretit për zgjedhjet vendore. I pyetur nëse ka tentuar të takojë Ramën, Meta tha se përpjekja e tij e vetme ka qenë të takojë Ruçin, por ky takim nuk ka ardhur për shkak të agjendës.
Më tej, Meta shtoi se është surprizuar nga reagimi i kryeministrit pasi bëri publik vendimin, por vijoi duke thumbuar, se Rama ka kohë të reflektojë.
“Kam qenë pak sëmurë këtë javë, por po bëhem pak më mirë. Kemi pasur një drekë sekrete, e fundit para 10 ditësh në Pallatin e Brigadave ku kemi biseduar dhe ai e di shumë mirë sa i shqetësuar jam unë për këtë situatë dhe tejkalimin e saj. I takonte atij të kërkonte datë tjetër për zgjedhjet. Prandaj Rama ka deklaruar se nuk ishte i surprizuar nga vendimi im.
Edi Rama e ka ditur sa i shqetësuar jam unë për këtë situatë, i takonte atij që të kërkonte një datë tjetër për zgjedhjet vendore. Dy tre ditë përpara se të merrej ky vendim, Rama e ka bërë të qartë që pala e tij nuk e vë në diskutim 30 qershorin. S’kam bërë ndonjë tentativë për të biseduar me Ramën.
Rama nuk është i surprizuar nga vendimi im. Kam bërë një përpjekje për të takuar Ruçin, por ai ishte në një takim në Tepelenë. Kështu që Rama e ka ditur, nuk është surprizuar nga vendimi im. Unë jam surprizuar nga reagimi i tij, megjithatë ka kohë të reflektojë”, tha ndër të tjera Meta.
