“Policisë së Shtetit i mjafton njolla e drogës, nuk ka nevojë edhe për njollën e prishjes së zgjedhjeve”. Kështu reagoi kryeparlamentari, njëherësh president i zgjedhur, Ilir Meta, ndaj thirrjes së kryeministrit Edi Rama, drejtuar policisë për tu angazhuar në funksion të mbledhjes së votave për PS-në.(deklaratë për të cilën Rama kërkoi sot ndjesë)
“Dua të shpreh shqetësimin e thellë për deklaratën tërësisht të paligjshme të kryeministrit Rama drejtuar policisë së shtetit”, tha Meta për mediet në përfundim të seancës së sotme të Kuvendit.
“Kjo është rruga e presionit dhe e keqpërdorimit të administratës. Ky është fundi i shtetit”, shtoi ai.
Meta gjithashtu shprehu keqardhje për mosreagimin e drejtorit të Përgjithshëm të Policisë së Shtetit ndaj deklaratës së Ramës. “Dënoj edhe heshtjen e drejtorit të Policisë ndaj deklaratës që shkel ligjin për policinë e shtetit”, shtoi ai, teksa përgëzoi reagimin e ministrit të Brendshëm teknik.
I pyetur rreth kërcënimeve për shkarkim në cilësinë e kreut të shtetit, Meta u kundërpërgjigj se rilindja nuk ka shans ta shkarkojë atë, ndërsa përsëriti paralajmërimin se, si president i ardhshëm nuk do të dekretojë një qeveri të dalë nga votat e vjedhura./Tirana Today/
