Qytetarë të shumtë janë mbledhur para Kryeministrisë, ndërsa të tjerë marshojnë drejt saj për të nisur protestën e nëntë kombëtare të opozitës së bashkuar.
Kjo protestë vjen ne një moment të tensionuar politik, ndërsa presidenti Meta duket se është gjithë ‘sy e veshë’ nga ajo që pritet të ndodhë sot.
Në një reagim, presidenti Meta apelon që protesta të jetë tërësisht paqësore, si dhe u bën thirrje protestuesve të vetëpërmbahen dhe të përqendrohen në kauzën për zgjedhje të lira dhe të ndershme.
“Presidenti i Republikës beson se zgjidhja e krizës do të vijë vetëm përmes dialogut dhe bashkëpunimit, dhe se ai do të vazhdojë pandërprerë përpjekjet e tij në këtë drejtim|, përmbyll në reagim presidenti Meta.
DEKLARATË E PRESIDENTIT TË REPUBLIKËS SH.T.Z. ILIR META
21 qershor 2019
Presidenti i Republikës Sh.T.Z Ilir Meta çmon se e drejta për të protestuar është e drejtë themelore dhe jetike për demokracinë.
Presidenti Meta thekson rëndësinë që protesta e sotme e Opozitës së Bashkuar të jetë tërësisht paqësore, larg çdo akti dhune, si dhe u bën thirrje protestuesve të vetëpërmbahen dhe të përqendrohen në kauzën për zgjedhje të lira dhe të ndershme.
Presidenti i Republikës beson se zgjidhja e krizës do të vijë vetëm përmes dialogut dhe bashkëpunimit, dhe se ai do të vazhdojë pandërprerë përpjekjet e tij në këtë drejtim.
