Presidenti Ilir Meta, i shoqëruar nga Këshilltari i tij për Sigurinë Kombëtare, Bahri Shaqiri dhe Zëvendësministri i Mbrojtjes, Petro Koçi, ka vizituar paraditen e sotme Shtëpinë e Pushimit të Ushtarakëve në Durrës, të kthyer në një qendër karantinimi, për shkak të pandemisë COVID 19.
Kreu i Shtetit vizitoi ambientet e kësaj qendre, dhe u njoh nga personeli ushtarak e shëndetësor me masat e marra, për garantimin e të gjitha standardeve të sigurisë shëndetësore të qytetarëve, të cilët po trajtohen aktualisht.
“Edhe pse një numër i pakët qytetarësh po trajtohen, kjo qendër i ka të gjitha kapacitetet për të pritur deri në 120 qytetarë me të gjitha standardet e sigurisë shëndetësore. Falenderoj të gjithë personelin ushtarak dhe shëndetësor, për gatishmërinë e tyre shembullore”, u shpreh presidenti Meta.
Dy pacientë, kontakte të rastit zero të cilët pas ritestimit të dytë dolën negativë, po bëhen gati të lënë spitalin. Gjashtë persona të tjerë kanë rezultuar të infektuar nga koronavirusi gjatë 24 orëve të fundit, në të gjithë Shqipërinë.
Së fundmi janë kryer 46 teste për COVID-19, dhe nga këto vetëm 6 persona kanë rezultuar pozitiv, duke e çuar në 76 numrin e përgjithshëm të të prekurve.
