Duket se kreu i Këshillit të Emërimeve në Drejtësi, Ardian Dvorani, nuk i trembet padisë penale dhe kjo ka bërë që presidenti Meta tu rikthehet presioneve dhe shantazheve.
Një ditë më parë, zëdhënësi i Kreut të Shtetit, Tedi Blushi, nuk ndali kërcënimet ndaj kreut të KED, duke deklaruar se Presidenca do të publikojë të tjera video që mund të implikojnë figurën e Dvoranit.
Përmes një postimi në rrjetin social Facebook, Blushi lë të kuptohet që këto video i disponon edhe Dvorani, teksa i kërkon atij që t’i publikojë i pari, për të mos rënduar pozitën e tij.
Po kështu, presidenti Meta ka sfiduar hapur SHBA dhe BE. Përmes një postimi në rrjetin social Facebook, Meta ka publikuar një video në gjuhën angleze, që sipas tij, implikon Dvoranin në shkelje flagrante të Kushtetutës.
Por publikimi i kësaj video në anglisht, duket se është bërë me qëllim që ky mesazh t’iu shkojë edhe ndërkombëtarëve, duke i sfiduar hapur.
